Oscarஇல் சுயாதீன படைப்புக்களின் எதிர்காலம் ?

உலகம் முழுவதும் அனிமேஷன் கலைஞர்களும் படைப்புக்களும் பெருகிவிட்ட காலமிது. புதிய படைப்புக்கள், வித்தியாசமான படைப்பாற்றல், மாறுபட்ட சிந்தனைத் தளம் என்று பலவிதமான அனிமேஷன் படைப்புக்களை திரைப்படவிழாக்களின் காண்கின்றோம்.

எண்ணற்ற திரைப்பட விழாக்களில் சுயாதீனப்படங்கள் வரிசையில் அனிமேஷன் படங்கள் அதிகரித்து வரும் சூழ்நிலையில் Oscar திரைப்பட விழாவில் மட்டும் ஸ்டுடியோக்களின் ஆதிக்கமே நிலவி வருகின்றது.

2001 ஆம் ஆண்டில் தான் முதன் முதலாக  Oscar திரைப்பட விழாவில் அனிமேஷன் படங்களுக்கென்று விருதுகள் அறிவிக்கப்பட்டன.

Pixar, Disney, DreamWorks, 20th Century Fox, Sony, Tim Burton, Blue Sky Studios,  Studio Ghibli, Laika, Nickelodeon, Cartoon Saloon போன்ற ஸ்டுடியோக்களின் படங்களே விருது வென்ற படங்களாகவும் விருதுக்காக பரிந்துரைக்கப்பட்ட படங்களாகவும் காணப்படுகின்றன. இதில் முதலிடத்தில் 9 விருதுகளை வென்று Pixar முதலிடத்திலும் 3 விருதுகளை வென்று Disney இரண்டாம் இடத்திலும் மூன்றாவதாக இரண்டு விருதுகளுடன் DreamWorks நிறுவனமும் காணப்படுகின்றது.

அமெரிக்கா எனும் முதலாளித்துவ நாட்டில் அதன் வழித்தோன்றல்களான  ஸ்டுடியோக்களின் ஆதிக்கம் நிலவுவதில் ஆச்சரியமில்லை. அனிமேஷன் படங்களை பொறுத்தவரை ஸ்டுடியோக்களிற்கிடையே மாபெரும் போட்டி நிலவுகின்றது. நாளுக்கு நாள்  தங்கள் படைப்புக்களின்  தொழில்நுட்ப மற்றும் உருவாக்கத் தரத்தை அதிகரித்து வருவதோடு மாறுபட்ட படைப்புக்களையும் கொடுத்து வருகின்றன. ஸ்டுடியோக்களின் போட்டித்தன்மையும் அதற்காக மேற்கொள்ளும் பிரயத்தனங்களும் நிறுவன பங்குகள் மற்றும் வணிக முக்கியத்துவமும்  தனிப்படமாக உருவாக்கப்படுமளவு சுவாரஸ்யமான சம்பவங்களை கொண்டுள்ளன எனலாம். 

பணமும் தொழில்நுட்ப வல்லமையும் கொண்ட ஸ்டுடியோக்களை தாண்டி  சுயாதீன அனிமேஷன் படங்கள் தங்களை உலக அரங்கில் நிருபித்து வருகின்றன.உலகின் மற்ற திரைப்பட விழாக்களில் நுழைந்து தனது இருப்பை ஸ்திரமாக பதிவு செய்தாலும் Oscar திரைப்பட விழாவில் நுழைவதே பெரும் சவாலாக அமைகின்றது.

 சிறப்பான படைப்புக்களாக தெரிந்தால் அவற்றின் விநியோக உரிமையை பெற்றுவிடுவதும் திறமையான படைப்பாளிகளை கவனித்து தங்களது நிறுவனத்தில் வேலைக்கு அமர்த்துவதன் மூலமாகவும் அவர்களுக்கு பட வாய்ப்புக்களை கொடுப்பதன் மூலமாகவும் தங்கள் நிறுவனத்தினை மேலும் உறுதிப்படுத்திக் கொள்கின்றன. உதாரணமாக Father and Daughter மூலம் சிறந்த அனிமேஷன் குறும்படத்திற்கான விருதினை வென்ற Michaël Dudok de Witக்கு  Studio Ghibli நிறுவனம் The Red Turtle படவாய்ப்பு கொடுத்து கடந்த வருடம் பரிந்த்துரைப்பில் இடம்பெற்றமையை நினைவுகூறலாம்.

சவால்மிக்க சூழலில் இந்த வருடம் நடைபெற்ற Oscar திரைப்பட விழாவில் சுயாதீனப் படங்களான Loving Vincent, The Breadwinner  பரிந்துரைக்கப்பட்டு கவனத்தை ஈர்த்ததோடு நம்பிக்கையையும் அளித்துள்ளது. 

Dorota Kobiela, Hugh Welchman இயக்கத்தில் வெளியான Loving Vincent, ஓவியர் வின்செட் வான்கோவின் வாழ்கை வரலாற்றுத் திரைப்படம். Polish Film Instituteஇன் பங்களிப்பில் முழுவதுமான வர்ணம் தீட்டப்பட்ட அனிமேஷன் திரைப்படமாக உருவாகியுள்ளது. சுயாதீன படங்கள் அனிமேஷன் திரைப்படங்களின் வடிவத்தில் பரிசோதனைகளை மேற்கொண்டு வருகின்றமை குறிப்பிடத்தக்கது. 

Nora Twomey இயக்கத்தில் வெளியான The Breadwinner, சர்வதேச கூட்டுத்தயாரிப்பில் வெளியாகியிருந்தாலும்  Cartoon Saloon நிறுவனத்தின் நிதிபங்களிப்பும் காணப்படுகின்றது. ஆப்கானை கதைக்களமாக்கி வெளியாகியுள்ளமை தேர்வுக்கு காரணமாக இருக்க கூடும் என்ற சந்தேகத்தை மீறி சிறப்பான  சுயாதீனப் படைப்பாக பல விருதுவிழாக்களில் பாராட்டுக்களை பெற்றமை குறிப்பிடத்தக்கது.

பரிந்துரைப்பு பட்டியலில் இடம்பெற்ற இந்த இரண்டு படங்கள் தந்த நம்பிக்கையால் எதிர் வரும் ஆண்டுகளில் மற்ற திரைப்பட விழாக்களைப் போலவே Oscar திரைப்பட விழாவிலும் சுயாதீனப் படங்களின் வருகையும் வெற்றியும் தனித்துவமாக பதிவு செய்யப்பட்டு ஸ்டுடியோக்களின் ஆதிகக்கம் மட்டுப்படுத்தப்படும் என்று எதிர்ப்பார்க்கப்படுகின்றது.