Tuesday, December 12, 2017

ரகசியம்



ஏன்
இத்தனை
பயம் கொள்ளச் செய்கிறது
இந்த உடல் ....

உஷ்ணம்
விரவிப் பரவி
கருகச் செய்யும்
கணத்தில்
நீர் ஊற்றி ஊற்றி
அணைத்து
தடுக்கிறேன்

ஏனோ
அதிகதிகமாக
ஒளிகின்றேன்

எதிலோ
நகர நகர
உதிர்ந்து விழுகின்றது
உடல்
அதில் உடைந்து தெறிக்கிறது
நான் எனும் நான்

சிதறிய கூறுகளை சேகரித்து இணைக்கின்றேன்
ஒட்டப்பட்ட உதிர்வுகளின் விரிசல்கள்
யாருக்கும் தெரியக்கூடாது என்றே
வெவ்வேறு வண்ணங்களை
படரச்செய்கின்றேன்.

அடர் வண்ணங்களில்
விரிசல்கள் தெரியவில்லை
மகிழ்ச்சி இதுவரை ...
ஆனால்
யாரும் பார்த்தால் ???

உற்றுப்பார்க்கும்
கண்களின் ஊடுருவலில்
ரகசியம் தெரிந்தால் ?
என்செய்வேன் ?                                                                    

பேரன்பு ❤


பனி தேசத்தின் பாலை நிலத்தின் 
நீண்ட தெருவின் மருண்மாலைப்பொழுது

ஓரிடம் 
உனக்கும் எனக்குமான 
எதிரெதிர் ஒற்றை இருக்கை
நிறுத்திவைக்கப்பட்ட ஒற்றைச்சைக்கிள்
பூக்களற்ற புற்சாலை
நம்மை சிறு புள்ளியாக மாற்றிச் சிரிக்கும்
தூரத்தே தெரியும் மாமலைகள்
வெயில் விரட்டும் குளிர்காற்று
நட்சத்திரங்களின் வருகைக்காக காத்திருக்கும்
இரவுக்கு முந்தைய பொழுதில்
பாதை தீர்மானிக்கா பயணக்காரனுக்கும்
பாதையின் கைதியானவளுக்கும்
அதிசயங்களின் கூறாய் அந்தச்சந்திப்பு

அயராத பயணத்தின்
எதிர்பாரா இளைப்பாறல்
எனக்கு
முரண் மொழி பகிரும் மகிழ் குழந்தை நான்
உனக்கு

யட்சத்தில்
எதிரினில்
எரிகின்ற
நான்

நிகழாத
கடந்த காலம்
எதிர்காலம்
கானல் நேரங்கள்
வரம்மரித்த தவம் 😇

நகரும் நேரத்தோடு
தொடரும் பயணம் ஆரம்பிக்க முன்னர்...

இந்த
பெருநிமிட
இடைவெளியில்
மௌனமாய் நிரம்புகின்றது
பேரன்பு 

தேடலற்ற கனவுலகம் - இலங்கை_தமிழ்சினிமாவின்_எதிர்காலம்





ஒரு தேசத்தின் உடைமைகளில் அந்த நாட்டின் கலைக்கு பெரும் முக்கியத்துவம் உண்டு. பெருவாரியான தேசங்களின் கலைகளில் சினிமாவுக்கு தரப்படும் முக்கியத்துவம் தனித்துவமானது.

உலகளாவிய ரீதியில், சினிமா என்பது கலை மட்டுமல்ல... ஒவ்வொரு நாடும், சினிமாவை மிகப்பெரிய சர்வதேச வணிகமாகவும் அதற்குள்ளே நுட்பமான அரசியல் ஆளுகை தன்மையை ஒளித்து வைத்தும் மறைமுகமாக அறிவுச்சண்டை நிகழ்த்தி வருகின்றது. அந்த வரிசையில் இலங்கை தமிழ் சினிமாவின் நிலை என்ன என்று ஒரு கேள்விகேட்டால், நமக்கு முழுமையான பதிலை சொல்ல முடியாதளவு குழப்பங்கள் இருப்பதால் மௌனமாக புன்னகைத்து மழுப்புவதையே நம் வழக்கமாக கொண்டுள்ளோம். ஆனால் சற்றே அந்த மௌனத்தை கூறுபிரித்து ஆய்வு செய்தால்.... நாம் ஊமைகள் அல்ல... எல்லாமே ஒருவித வெற்று மௌனம் என்பது இலகுவில் புரிந்துவிடுவதோடு, நம் மௌனத்திற்குள்ளே ஓர் அர்த்தபூர்வமான பதில் புதைந்திருக்கின்றது என்ற உண்மையும் புலப்படும்.

இலங்கை சினிமாவின் முடக்கத்துக்கு போர் மற்றும் இனப்பிரச்சினையை காரணமாக கூறுவது சில தரப்பின் கடமையாகவே இருகின்றது. உலக அரங்கில் போர் என்பது சினிமாவின் மாபெரும் வியாபார தளம். இரண்டாம் உலகப்போரினை மையப்படுத்தி வெளியான படங்களே அதன் சாட்சிகள். போர் சூழல் என்பது உலகின் கவனத்தை தன் திரைப்படத்தின் மீது திருப்ப ஒரு நாட்டுக்கும் படைப்புக்களை உருவாக்குபவர்களுக்கும் மிக அருமையான சந்தைக்காரணி. (போர் கதைகள் மட்டுமே எடுக்க வேண்டும் என்ற தேவை இல்லை.. அதனை களமாக தேர்வு செய்தால் அது இலகுவான சந்தைக்காரணியாக அமையும் .....) அதனை சரியாக உணர்ந்த பல நாடுகள் தங்கள் குரலை படைப்புக்கள் மூலம் அழுத்தமாக பதித்து சர்வதேசத்தின் கவனத்தை பெற்றுவருகின்றன. அவர்களால் சாத்தியப்படுத்தப்படும் சினிமா ஏன் இலங்கையில் சாத்தியமில்லை என்று சிந்தித்தால் அதற்கு இரண்டு காரணங்கள் உள்ளன.

முதல் காரணம் நமக்கான சந்தை வாய்ப்புக்களை எதிர்மறையாக அணுகும் இலங்கை தமிழ் மக்களின் பொதுமை போக்கு. இரண்டாவது காரணம் சினிமா பற்றிய அடிப்படை புரிதலும் தேடலும் அற்ற மேம்போக்கான தன்மை.
கற்றுக்கொள்கின்ற தன்மை, அர்ப்பணிப்புணர்வு, அறிவுசார் தேடல், உலகத்தின்மீதான கவனிப்பு போன்ற அடிப்படை தகைமைகளை கூட நாம் கருத்திற்கொள்ள மறுப்பதினால் சர்வதேச சந்தையில் மட்டுமல்ல நம் மத்தியில் திரையிடக்கூட பொருத்தமற்ற படைப்புக்களை உற்பத்தி செய்து வருகின்றோம்.

வணிகம் எனும் போது அதன் சந்தை தன்மை என்பதை சரியாக கவனித்தால் மட்டுமே வெற்றியை சரியாக அடையமுடியும். இலங்கை தமிழ் சினிமா தனக்கான சந்தை வாய்ப்புக்களை சரியாக இனம் காணவில்லை என்பதே அடிப்படையான உண்மை. இந்தியாவை பொறுத்தவரை சினிமா என்பது தொழிற்சாலை. அங்கே உடனடி வருமானத்திற்கான சிறு கைத்தொழில் வணிகம் போலவே சினிமா வியாபாரம் நடைமுறைப்படுத்தப்படுகின்றது. மக்களின் எண்ணிக்கை உட்பட பல காரணங்கள் அந்த பாதைக்கு வித்திட்டிருகின்றது. ஆனால் இலங்கை சூழல் அப்படி அல்ல ...

பிரதேச ரீதியாக மக்கள் தொகை குறைவாகவும் தமிழ் மற்றும் சிங்களம் என்ற 2 மொழி பேசும் மக்கள் இருப்பதாலும் இங்கே (தொழிற்சாலை கட்டமைப்பினை விட ) சுயாதீன படைப்புக்களுக்கு மிகப்பெரிய களம் இயல்பாகவே இருக்கின்றது. எப்பொழுதும் மேலைத்தேய நாடுகளின் பார்வை இலங்கையின் மீது நிலைத்திருப்பதனால் சர்வதேச சினிமாவின் வியாபார சந்தையை எம்மால் மிக இலகுவாகவே அடையக்கூடிய சாத்தியங்கள் இருக்கின்றன. ஆனால் நம் கண்களுக்கு முன்னே இருக்கின்ற அற்புதமான களங்கள் அனைத்தையும் எதிர்மறையாக கருதி எமக்கு வாய்ப்பில்லை, Industry இல்லை அதனால் சினிமா எடுக்க முடியவில்லை என்று புலம்பித்திரிகின்ற அறியாமைநிலை இங்கு உருவாகிவிட்டது.

இன்றைய காலத்தில் சுயாதீன படைப்புக்கள் உருவாகின்றன. நிறைய படைப்புக்கள் வருகின்றன என்று கூறினால் அது அடுத்த கட்ட அறியாமை. எண்ணிக்கை பெருகுவதில் எந்த பெருமைகளும் இல்லை. வருகின்ற எல்லாமே சினிமாவாக இருந்தால்தானே அதனை சினிமாவாக கருதி சிந்திக்க முடியும். வீடியோக்களை பதிவு செய்யும் தன்மையை சினிமா என்று கூறுவதை யாராலும் ஏற்றுகொள்ளவே முடியாது. சினிமாவின் வடிவத்தையும் திரைமொழியையும் அறியமுடியாத நிலையில் ‘’சினிமா’’ என்பது எப்படி சாத்தியமாகும் ?

இங்கு சினிமா என்று கூறினாலே நம் மத்தியில் பேசு பொருளாக அமைவது அந்த படத்தின் கதைகளும் அதில்வெளிப்படும் கருப்பொருளும் மட்டுமே. ஒரு திரைப்பட விமர்சகராக, ஆய்வாளராக, இயக்குனராக,படைப்பாளியாக நாம் செயற்பட விரும்பினால் சினிமாவின் வடிவத்தை முழுமையாகவும் நுட்பமாகவும் அறிதல் அவசியம். அதுவே அனைத்துக்கும் ஆரம்பம். அந்த அறிதலில் மட்டுமே சினிமா என்ற விடயம் நமக்கு புலப்படுகின்றது.

இலங்கை தமிழ் சூழலை பொறுத்தவரை ஒரு சினிமாவை விமர்சிப்பது என்பது மிக இலகுவான விடயம். படத்தின் கதையை ஒரு விவாத மேடையின் தலைப்பாக பாவித்தே திரைப்படங்கள் தொடர்பான விமர்சனங்களும் கட்டுரைகளும் முன்வைக்கப்படுகின்றன. சினிமா ஆர்வலர்களுக்கும் திரைப்படைப்புக்களை உருவாக்குபவர்களுக்கும் சினிமா பற்றிய அடிப்படை புரிதல் கூட தேவையில்லை என்ற நிலை இங்கிருகின்றது. கதையை விவாதிக்க தெரிந்தால் சினிமா ஆர்வலர் என்றும் கதையும் காமிராவும் இருந்தால் படைப்பாளிகள் என்றும் நாம் புரிந்து வைத்திருக்கின்றோம்.

சினிமா என்பது கலையும் அறிவியலும் கூடிப்பெற்ற குழந்தை என்பதை நாம் மறந்துவிடுகின்றோம்.
கதை – திரைக்கதை இரண்டுக்குமான வித்தியாசம் என்ன ? திரைமொழி என்றால் என்ன ? என்பதை அறியாமல் ஒரு திரைப்படத்தை உருவாக்க முடியாது.
ஒரே ஒரு ஷாட்டை எடுத்தால் அதில் Balance,Lines,Colour,Light,Shapes,Movement,Bloging,Composing,Tools ... உட்பட பல விடயங்கள் உள்ளன. இவற்றை பயன்படுத்தி எப்படி ஒரு காட்சியில் கதை வடிவமைக்கப்பட்டு சொல்லப்படுகின்றது என்பதை பற்றியும் அதன் emotion எப்படி பார்வையாளர்களுக்கு கடத்தப்படுகின்றது என்பதை பற்றியும் தெளிவு கொண்டவர்களினால் சினிமாவை உருவாக்கிவிட முடியும்.
இதனை பற்றிய தெளிவற்றவர்கள் கதைகளை காமிராவில் பதிவு செய்ய முடியுமே ஒழியே அதனை சினிமாவாக மாற்ற முடியாது. சினிமா விமர்சகர்கள், ஆர்வலர்கள் எனும் போது இவை அனைத்தையும் அறிந்து வைப்பதோடு எதிர்கால நுட்பங்களின் தேவைகளை பற்றிய தெளிவும் இருத்தல் வேண்டும். படைப்பாளியை விட விமர்சகனுக்கு அதிக புரிதலும் தெளிதலும் இருத்தல் அவசியம்.

மேலைத்தேய சினிமாக்களை பார்த்து சிலாகிக்கும் நாம் அது அவர்களின் இயல்பான படைப்பாக்க பாணி (ஸ்டைல்) என்று கூறுகின்றோம். அவர்கள் சினிமாவின் வடிவத்தை சரியாக புரிந்துகொண்டு படைப்புக்களை முன்வைப்பதை நாம் அந்த நாட்டிற்குரிய ஸ்டைல் என்று பொதுமைப்படுத்தி பேசுகின்றோம். ஸ்டூடியோக்களுக்கு ( தயாரிப்பு நிறுவனங்கள் ) கட்டுப்பட்டு இயங்கும் படங்கள், இருக்கின்ற சினிமா வடிவத்தினை சிறப்பாக பயன்படுத்துவதையும் சுயாதீன படைப்பாளிகள், அந்த வடிவத்தில் புதிய தேடலை மேற்கொள்வதையும் அந்த நாடுகளில் வழக்கமாக காண்கின்றோம்.

இலங்கையை பொறுத்தவரை இந்த வடிவம் பற்றிய புரிதல் ஆரம்பகாலத்தில் மிகச்சிறப்பாகவே படைப்பாளிகளுக்கு இருந்திருக்கின்றன. குறிப்பிட்ட காலத்தின் பின்னர், வடிவம் மற்றும் திரைமொழி பற்றிய முழுமையான புரிதல் அற்ற, இந்திய சினிமாவின் வணிக அந்தஸ்தின் மீது ஏற்பட்ட ஈர்ப்பினால் பிரதியெடுக்கும் தன்மைக்கு நாம் மாறிவிட்டமையே இலங்கை தமிழ் சினிமா தனக்கான தனித்துவ அடையாளத்தை உலக அரங்கில் நிலை நிறுத்த தவறியதன் முக்கிய காரணம்.

இன்று சினிமா துறைக்குள் வருபவர்கள் சிங்கள சினிமா, ஈழ சினிமா என்ற வார்த்தை பிரயோகங்களை தவிர்த்து இலங்கை சினிமா என்ற அடையாளத்தை நாம் பேண ஆரம்பித்தால் மட்டுமே சர்வதேச அரங்கில் நாம் நுழைய முடியும். அடையாளம் ஒன்றாகவும் உள்ளடக்க மொழி என்பது வேறுபடலாம் என்பதையும் நாம் புரிந்து செயற்பட வேண்டும். இலங்கை தமிழ் சினிமாவின் எதிர்காலம் பற்றி பேசும் சிந்திக்கும் நபர்கள் அனைவரும் இலங்கையின் சிங்கள மொழிபேசும் பழைய படங்களை அவசியம் பார்த்து அவற்றில் பல விடயங்களை கற்ற வேண்டும். இன ரீதியான பாகுபாட்டு முறைகளை கடந்து சினிமாவை சினிமாவாக நேசிக்க நாம் பழகவேண்டும். இலங்கையில் உருவாக்கப்பட்ட திரைப்படங்களில் சிங்கள மொழியில் உருவாக்கப்பட்ட படைப்புக்கள் பார்க்கும் போது சர்வதேசத்தை நோக்கிய சினிமாவின் பயணத்திற்கும் திரைமொழியின் தேர்ந்த வடிவத்திற்கும் என்றோ இலங்கை சினிமா உதாரணமாக அமைத்துள்ளது என்பதையும் அவற்றைப்பற்றி அறியாமலே சினிமா பற்றி குறைப்பட்டுக்கொண்டிருகின்றோம் என்பதையும் இனியாவது முறையாக உணர்ந்தால் இலங்கை சினிமாவின் அடுத்த கட்டம் பற்றிய புரிதல் முழுமையாக ஏற்படும்.

Wow 2017






Women of the World Festival in Sri Lankaவில் 2 ஆம் நாள்
5 இயக்குனர்களின் குறும்படங்கள் திரையிடப்பட்டு அதன் பின்னர்
சினிமா செயற்பாட்டாளரும் ஆவணப்பட இயக்குனருமான அனோமோ ராஜகருணா தலைமையில் கலந்துரையாடல் பகுதி இடம்பெற்றது.

இலங்கையில் பெண் இயக்குனராக எதிர்கொள்ளும் பிரச்சினைகளை பற்றியும் அவரவர் படங்களில் இடம்பெற்ற
பெண் கதாபாத்திரங்களை மையப்படுத்தி இயக்குனர்கள் வெளிப்படுத்த முயன்ற சிந்தனைகளை பற்றியும் ஆரம்பத்தில் கேட்கப்பட்டது. அதன் பின்னர் பார்வையாளர்களுக்கான கேள்வி பதில் பகுதி இடம்பெற்றது.
ஒவ்வொருவரும் பேசியவற்றிலிருந்து சில விடயங்கள் .....

Anomaa Rajakaruna
இருபது வருடங்களுக்கு முன்னர் குறும்படம் எடுக்கையில் அதிகமான பிரச்சினைகளை எதிர்கொண்டேன். இன்று காலம் மாறியிருகின்றது...மாற்றங்களூடாக பயணித்து நம்பிக்கைதரும் நிறைய படைப்புக்களும் படைப்பாளிகளும் உருவாகியுள்ளனர் என்பது மகிழ்ச்சியளிகின்றது.ஆனால் இந்த படைப்புக்களுக்கும் பார்வையாளர்களுக்கும் மிகப்பெரிய தூரம் உள்ளது. படைப்புகளின் திரையிடலுக்கான வாய்ப்பின்மை காரணமாகவே இந்த படங்களின் மக்களிடம் சரியாக சென்று சேரவில்லை.திரைப்படக் கூட்டுத்தாபனம் மற்றும் திரையரங்கங்கள் உட்பட பல அமைப்புகளும் இதில் கவனம் செலுத்த வேண்டும்.

Lanka Bandaranayake
கால மாற்றத்தால் பிரச்சினைகள் தீரவில்லை; குறைந்திருக்கிறது எனலாம்.எதிர்கொள்ளும் பிரச்சினைகள் அனைத்தும் personality (ஆளுமை ) என்பதை பொறுத்து அமைகின்றது. சினிமாவிற்கு என்று நாங்கள் வரும் போது எந்தளவு நாம் personality ஐ மேம்படுத்துகின்றோமோ அந்தளவு பிரச்சினைகளை சமாளித்து இலக்கை அடையலாம். பெண்ணாக பெண்களோடு சினிமாவில் பணிபுரிய ஆசைப்படுகின்றேன் பெண்கள் இந்ததுறைக்கு வருவதில் பெரும் பின்னடைவு இருப்பதால் எனது ஆசை இன்னும் நிறைவேறவில்லை. சகல துறைகளிலும் பெண்கள் பங்கேற்க வேண்டும்.

Nipu Fernando
ஒரு ஆண் படம் எடுக்க வேண்டும் என்று கிளம்பி அதனை செயற்படுத்துவதற்கும் ஒரு பெண் அந்த முடிவை எடுப்பதற்கும் செயற்படுத்துவதற்கும் நிறையவே வித்தியாசங்கள் உண்டு. இலகுவான பயணமாக அமைவதில்லை. பணம்,களத்தில் பணி புரிதல்,சொந்த வாழ்க்கை,வாழ்க்கை துணை உட்பட பல தடைகள் எதிர்கொள்ள நேரிடுகின்றது.அனைத்தையும் கடந்து செயற்பட வேண்டும்.
நமக்கென்று ஒரு குரல் இருக்கும் அதனை உலகத்திற்கு வெளிப்படுத்த எண்ணுவோம்.நம் பெற்றோர்கள் அதை மறுப்பார்கள்.அவர்கள் சொல்கின்ற வாழ்வை வாழ ஆரம்பிப்போம் நாம் பெற்றோர்களான பின்னர் நமது நிறைவேறாத ஆசைகளை பிள்ளைகள் மூலமாக நிறைவேற்ற எண்ணுவோம். அங்கே நமது பிள்ளைகளின் குரலை நாங்கள் தடுக்கிறோம்.அவர்களும் வளர்ந்து இதையே செய்ய சுழற்சியாக மாறும். அவரவர் வாழ்க்கையை அவரவர்கள் வாழ முற்படுகையில் மட்டுமே மாற்றங்கள் சாத்தியம் என்பதை என் படத்தில் வெளிப்படுத்தியுள்ளேன்.

Bavaneedha Loganathan
ஆண் பெண் பாகுபாடு எனக்கில்லை .... நான் இயக்குனர் என்றால் இயக்குனர். அவ்வளவு தான். பிரச்சினைகளை சவால்களாக பார்க்கின்றேன்... சவால்களை எதிர்கொள்ள தயாராக இருக்கின்றேன். சினிமா தான் என் வாழ்க்கை... அதற்காக என்னை தகுதிபடுத்த உறுதிபடுத்த தேடித்தேடி கற்கின்றேன். எந்த சூழ்நிலையிலும் எந்த கட்டத்திலும் என் மன உறுதி உடைந்ததே இல்லை ....
சமுக கருத்து சொல்லவேண்டும் என்று திட்டமிடவில்லை. உண்மையில் நான் எப்படியானவள் என்றால் எனக்கு தடையாகவுள்ள குடும்ப அமைப்பை பற்றி விமர்சித்துக் கொண்டிருக்கின்றேனே ஒழிய அதனை விட்டு இன்னும் வெளியேற முடியாத சிக்கலுக்குள் இருக்கும் முரண்பாடானவள் . உடல் சார்ந்த உளவியல் கட்டுடைப்புகளை நான் இன்னும் முழுமையாக மேற்கொள்ளவில்லை. அதுபற்றிய புரிதலும் குழப்பமும் நிரம்பிய எண்ணவோட்டங்களின் ஒருபகுதியை திரையில் பார்க்கலாம். சாதாரண சீண்டல் முதல் பாலியல் துன்புறுத்தல் வரை எது நடந்தாலும் உங்கள் உடலை முன்னிறுத்தி உடைந்து போதல் கூடாது. உடல் என்பது முழுமையான நீங்கள் அல்ல எனபதை நம்புகின்ற மனநிலை வேண்டும்.எப்போதும் உறுதியுடன் செயற்பட வேண்டும்.

Shanaz Deen
சினிமா மட்டுமல்ல எல்லா விடயங்களிலும் ஆண் பெண் பாகுபாடு இன்றி அதை வேலையாக மட்டுமே கருதி செய்கின்றேன். யாரவது ஒருவர் நான் பெண் என்பதையும் இந்த மதத்தை சேர்ந்தவள் என்பதையும் எனக்கு நினைவுபடுத்தும் போது மட்டுமே தோன்றும். அப்படியான நினைவூட்டல்களை கேள்விகளை எப்போதும் பொருட்படுத்துவதில்லை.
நீங்கள் படத்தில் பார்த்தது எனது கதை .....என் தாயார் இளவயது திருமணத்தை தடுத்து என் கனவுகளை நனவாக்கினார்.என் தாயாரின் ஊக்கத்தில் தான் இந்த அளவு நான் முன்னேறியுள்ளேன்.
இளவயது திருமணங்களை வீட்டுப் பெண்கள் தடுக்கவேண்டும். உறுதியான முடிவினை எடுக்க வேண்டும். உங்கள் பிள்ளைகளின் கனவுகளை நிறைவேற்ற முயற்சியுங்கள். எதிர்காலத்திற்காக ஊக்கப்படுத்துங்கள்... நிச்சியம் அவர்கள் சாதிப்பார்க்கள்.

Ajantha Wijewardena
நான் எல்லாவிதமான தடைகளையும் எதிர்கொண்டுள்ளேன். கொஞ்சம் அதிக நேரம் ஆன்லைனில் இருந்தால் கூட ஏன் அவ்வளவு நேரம் ஆன்லைனில் இருக்கிறாய் என்று ஆரம்பித்து எல்லாவிதமான தனிப்பட்ட விடயங்களையும் விமர்சிக்க தலையிட ஆரம்பிக்கும் குணம் இங்குள்ளது. எல்லாவற்றுக்கும் கட்டுப்பட்டு அவர்களது கேள்விகளுக்கு பதில் சொல்ல தயார்படுத்தபடுகின்றோம். இப்படியான சூழலில்
நாங்கள் சினிமா என்ற துறைக்கு செல்கையில் அனைத்தும் பூதாகரமாக்கபடுகின்றது. அனைத்தையும் மீறிதான் எங்கள் படைப்புக்களை உங்களுக்கு முன்வைகின்றோம். எங்கள் கேள்விகளை கோபங்களை முடிவுகளை குழப்பங்களை உறுதியை எங்கள் படைப்புக்களில் வெளிப்படுத்துகின்றோம்.
பெண்களின் மீதான கலாசார பாரம்பரிய அழுத்தங்கள் எல்லாமே அடுத்த தலைமுறைக்கு எடுத்து செல்வது பெண்கள் தான். அம்மாக்கள் தங்கள் பிள்ளைகளுக்கு சொல்ல, அதை அவர்கள் தங்களது பிள்ளைகளுக்கு சொல்கின்றார்கள் . இது நிற்க வேண்டும் . சுய சிந்தனை வளர வேண்டும் ஒவ்வொரு பெண்ணும் சுயமாக சிந்திக்க ஆரம்பித்தால் அதுதான் அவர்களின் முதல் வளர்ச்சி.

Painting in movies - Inception




திரைப்படங்களில் ஒரு Frame என்பது, வெறும் கேமராவின் பார்வை சார்ந்தது மட்டுமின்றி பல விடயங்களை உள்ளடக்கியதாக அமைகின்றது.
Everything within the frame makes up the frame என்பதற்கேற்ப
ஒளிப்பதிவு விடயங்கள் (lighting,camera angle etc)
Character elements (blocking,Costume)
Set design ( props, decor) உட்பட பல விடயங்களை உள்ளடக்கியே
ஒரு Frame உருவாக்கப்படுகின்றது.

Set design என்ற பிரிவில் Propகளின் பங்கு அளப்பரியது.
Props என்பவை வெறும் காட்சியின் சூழலை இட்டு நிரப்புகின்ற
பொருட்கள் அல்ல.
படத்தின் கதையினை கட்டியெழுப்பும் கூறுகளில் முக்கியமானவை.
சினிமாவில் கதை சொல்ல ,கதாபாத்திர பயன்பாட்டிற்கு, கதாபாத்திர அசைவுகளுக்கு,திருப்புமுனை ஏற்படுத்த ,Background Prop,Stunt Prop,திரைக்கதையின் கட்டமைப்புக்கு என்ற ரீதியில் பலவிதமான Props, பலதரப்பட்ட விதத்தில் பயன்படுத்தப்படுகின்றன.
கதைக்கு பொருத்தமற்ற எந்த ஒரு பொருளையும் நாம் பயன்படுத்த முடியாத அதே வேளை, பயன்படுத்துகின்ற பொருளானது படத்தில் சரியான
''MOOD'' ஐ உருவாக்குகின்றது என்பதை தெளிவாக உணர்ந்தே ஒவ்வொரு Frameலும் அதற்கேற்ற Props தீர்மானிக்கப்படுகின்றது.

திரைப்படங்களில் இடம்பெறும் பலவிதமான Propகளில்
சுவர் ஓவியங்கள் பற்றி மட்டும் கவனித்தால் ...
இதுவரை படங்களில் இடம்பெற்ற சுவர் ஓவியங்களில்
பிரபலமான ஓவியங்கள் ,
படத்திற்காகவே பிரத்தியேகமாக உருவாக்கப்பட்ட ஓவியங்கள் , பிரம்மாண்டத்தையோ அல்லது புதிய உணர்வையோ தோற்றுவிக்கும் விதத்தில் பயன்படுத்தப்பட்ட ஓவியங்கள் , எதேச்சையாக படத்தில் இடம்பெற்ற ஓவியங்கள் என்று
பல பிரிவுகளில் பல்வேறு ஓவியங்களை காணலாம்.
இதில் உலகளாவிய ரீதியில் புகழ்பெற்ற ஓவியங்களை
திரைப்படங்களில் பயன்படுத்தும் வழக்கமாக காணப்படுகின்றது .
அந்த ஓவியங்கள் பிரபலமானவை என்பதை தாண்டி
ஏன் பயன்படுத்தினார்கள் , அதன் முக்கியத்துவமும் அவசியமும் என்ன ,எப்படிபட்ட தாக்கத்தை அதன் மூலம் பார்வையாளர்களுக்கு ஏற்படுத்தினார்கள் ,
என்பதையும் திரைமொழியில் அதன் முக்கியத்துவத்துவமும்
தாக்கமும் என்ன என்பதையும் நாம் அவசியம் கவனிக்க வேண்டும்.

Paintings in movies தொடரில் முதலாவதாக,
கதாபாத்திரங்களின் முடிவோடு மறைமுகமாக சம்பந்தப்பட்ட
ஓவியங்களை உள்ளடக்கிய திரைப்படங்களில் முக்கியமானது Inception.

ஒரு திரைப்படத்தில் ஆரம்பம் முதல் இறுதிவரை அனைத்தையும் பார்வையாளர்களுக்கு அறிவித்துகொண்டே
இருப்பதோடு அவர்களின் சிந்தனைக்கு இடம்தராத திரைப்படங்கள் ஒருவகை என்றால்
சிந்தனைக்கு களம் அமைக்கும் படங்கள் இன்னொரு வகையாகும் . (இவற்றை Open film - Closed film என்றும் கூறுவது ஆரம்ப கட்ட பொதுவான இனம்காணலாக அமைகின்றது. Open-Closed என்று வகைப்பிரிப்பதில் பல விடயங்கள் உண்டு அதைப்பற்றி தனிப்பதிவில் பார்க்கலாம் )
இதுதான் முடிவு என்று தீர்மானிக்க முடியாத படங்களை Open ending என்று கடந்துவிடுகின்றோம்.
பெரும்பாலும் இதுபோன்ற படங்களில் முடிவினை தீர்மானிக்க ஏற்ற அனுமானங்கள் படத்தில் எங்கேனும் காட்டப்படுவது வழக்கம்.
அந்த வகையில் Inception படத்தின் இறுதி முடிவு தொடர்பான அனுமானங்களில் ஒன்றாக ஆரம்பத்தில்
வரும் ஓவியத்தை கருதலாம்.

படத்தின் ஆரம்ப கட்ட கனவு காட்சியில் மால்( Marion Cotillard) மற்றும்
காப்பின்(Leonardo DiCaprio) சந்திப்பின் போது
பிரபல பின்நவீனத்துவ ஓவியர் Francis bacon வரைந்த ஓவியம் பின்னணியில் காட்டப்படுகிறது.
இந்த ஓவியத்தைக் குறித்து வசனமும் இடம்பெறும்.

ஐரிஷ் ஓவியர் Francis bacon, தனது காதலர் George Dyerஐ மையப்படுத்தி பல ஓவியங்களை வரைந்துள்ளார் . அவற்றில் 1967ஆம் ஆண்டு 'study for head of George Dyer' தலைப்பில் Expressionism ஸ்டைலில் வரையப்பட்ட ஓவியம் இது!
George Dyer இன் தற்கொலைக்கு பின்னர்
Francis bacon இன் இயல்பு வாழ்க்கையில் பல மாற்றங்கள் நிகழ்ந்தன.
Dyer இன் நினைவுகள் எப்போதும் அவரை தொடர்ந்துகொண்டே இருந்தன. முக்கியமாக குற்ற உணர்ச்சி அவரை வதைத்தது.
அந்த உணர்வுகளின் வெளிப்பாட்டில் Dyerஇன் முகத்தை தொடர்ந்து ஓவியங்களில் வெளிப்படுத்த ஆரம்பித்தார்.
Inception படத்தில்
George Dyer ஆக மால் கதாபாத்திரத்தையும் Francis baconஆக காப் கதாபாத்திரத்தையும் நோலன் வெளிப்படுத்தியிருக்கின்றார் என்று அனுமானிக்கலாம்.

இதனடிப்படையில்
மனைவி மாலின் மரணத்திற்கு தானே காரணம் என்ற குற்ற உணர்ச்சி எப்போதும் காப்பை துரத்தி,
சகல மன /மூளை அடுக்குகளிலும் அவளுடைய நினைவுகள் அவனை கொஞ்சம் கொஞ்சமாக சிதைத்ததை நோலன் இவ்வாறு வெளிப்படுத்தியதாக கருதலாம்.
இறுதி காட்சியானது கனவா நனவா என்ற கேள்வி உருவாகும் போதுகூட, இந்த விடயத்தை கொண்டு முடிவினை நாம் அனுமானிக்கலாம்.

Batman(Figure with Meat ),Entrapment (Figure in Movement) படங்களிலும் Francis bacon இன் ஓவியங்கள் இடம்பெற்றிருந்தாலும்
அவற்றின் முக்கியத்துவம் Background பொருட்களாக மட்டுமே இருக்கும்.
ஆனால் Inception படத்தில்
சுவர் ஓவியம் என்பதை தாண்டி கதாபாத்திர மனநிலையை யூகித்து கதையின் முடிவினை
அனுமானிக்க செய்யும் விதத்தில் பயன்படுத்தப்பட்டுள்ளது.

ஒரு ஓவியத்தின் பின்னணியில் ஒளிந்திருக்கும் நிஜமான தாக்கத்தை அடிப்படையாக கொண்டு, படத்தின் கதாபாத்திரங்களின் உணர்வுகளை வெளிப்படுத்துவதோடு
முடிவின் அனுமானத்திற்கும் களம் அமைக்கலாம் என்பதை Inception படத்தின் இந்த காட்சி உணர்த்துகிறது.

நன்றி - Mahesh Raghavan

Monday, July 10, 2017

அநாதைக்கருவாளிகள்!



ஒற்றைக்கனவில் ஊடாடும்
வாழ்க்கை
துறவுக்கும் துணைக்கும் இடையில்
இயைவு தேடி நகரும்.

வெளிச்சத்திரையில்
கண்ணீர் கசியும் நொடிகளுக்காக
போலிப்புன்னகை சுமந்து
இடம்பெறும் பொழுதுகள்
என்று இடம்பெயரும் ?

வலிக்க வலிக்க
செதுக்கிச்செதுக்கி செய்யும் தவம்
உனதல்ல எனவும்
அது
எளிதல்ல எனவும் பறை .

இக்கனா
தேயம் அழிக்கும் தேயு.
கனவின் தேளை தொடர
என் தார்ட்டியம் அறியா
உலகம்
சிரிக்கும் ...பழிக்கும்.

என் துருவம் மரியா
துல்லம் எதிரொலிக்கும்
என்றென்றும்.

கனவின் நீட்சி
எனை அழிக்கும்
எனை மீள் உயிர்க்கும்.

தனை கரைத்து கலை புரியும்
மகவுகளை சுவிகரிக்க யாருண்டு ?
ஆனாலும்
வாழ்வுண்டு.

அநாதைக்கருவாளிகள்
உயிர்க்கும் கருப்பைகள்
இருப்பறியா இன்மையாய்
துடிதுடித்தே உயிர்க்கும் .

இறப்புக்கும் உயிர்ப்புக்குமான
துலாபார நாட்கள்
அது தீர்மானிக்கும்
வாழ்நர் நாமங்கள்.

வாழ்வின் தாழ்
திறக்கும் வரை
தொடரும்
இந்த
ஒற்றைக்கனவில் ஊடாடும்
வாழ்க்கை.!

Thursday, June 22, 2017

திரை ஓவியன் -Gaspar Noé


சமிப காலமாக இயக்குனர் Gaspar Noéவின் படங்களை பற்றி பலரும் பதிவிடுகின்றனர். 
சில வருடங்களுக்கு முன்னர் Gaspar Noéவின் படங்களை 
திரைக்கதைபற்றிய சுய கற்றலில் அவரை பற்றி எழுதி சிறு ஆய்வு செய்திருக்கிறேன். 
ஓவியம் பற்றி முழுமையாக தெரியாததால் அப்படியே வைத்துவிட்டு வேறு படத்தில் மூழ்கி விட்டேன். 

இயக்குனர் Gaspar Noéஇன் படங்களை பலரும் பார்த்தாலும்
அதில் உள்ள காமத்தை மட்டுமே வைத்து பேச முற்படுகின்றனர்.
இன்றைய சூழலில் காமம் பற்றி பேசுவதும் எழுதுவதும் அதிகரித்திருப்பதால்
தங்களது கருத்துக்களுக்கு இவருடைய படங்களையும் துணைக்கழைப்பது நடந்துவருகிறது. 
அது வெறும் அறிமுக நிலை தான் !
அதை தாண்டி நாம் செல்ல வேண்டியது முக்கியம். 
அதுதான் படைப்பாளி பற்றிய புரிதலை விதைக்கும் .

ஆர்ஜென்டினாவின் கலை இலக்கியத்தில் 
''புதிய அடையாளத்தினை '' நிறுவியவர்களில் முக்கியமான ஓவியர்,எழுத்தாளர் Luis Felipe Noé.
அவரின் மகன் தான் Gaspar Noé.
Expressionism பற்றி தேடும் போது நிச்சயம் இவரை பற்றி அறிவீர்கள். 
Luis Felipe Noéவின் ஓவியத்தில் கையாண்ட intellectual ஆளுமையும் தேடலும் அதீதமானது.
Neofiguration ஓவியங்கள் தடைசெய்யப்பட்ட பின்னர், அவர் இடம்பெயர்ந்தார்.
Luis Felipe Noéவின் படைப்பு தொடர்ச்சி Gaspar Noéவில் சற்றே மாறுபட்டு வெளிப்படுகின்றது.

ஓவியத்தில் தந்தை கையாண்ட Expressivism என்பதன் இன்னொரு நீட்சியை மகன் ஒளிஓவியத்தில் கையாள்கிறார் எனலாம்.
இயக்குனர் Stanley Kubrick அவரது ஆதர்ஷ இயக்குனர் என்பது குறிப்படத்தக்கது. 
''பரிசோதனை முயற்சி'' என்ற வார்த்தைக்குள் அனைத்து தேடல்களையும் அடைத்துவிடுகிறோம். 
Stanley Kubrickஇன் தேடலை அப்படி அடையாளப்படுத்த மறந்தது /முடியாமல் போனதைப் போலவே பல இயக்குனர்களையும் நாம் வட்டத்துக்குள் அடைத்து வைத்து படைப்புகளை காண்கிறோம் .
Gaspar Noéஇன் படங்களை காமம் பற்றிய கட்டுபாடுகளை உடைகிறது என்று கூறுகிறோம்.அது முழுமையான புரிதல் அல்ல .
Gaspar Noéஇன் குறும்படங்களையும் பாருங்கள் 
இன்னுமொரு களத்துக்கு உங்களை அழைத்துசெல்லும் .

காமம் பற்றிய களம் என்ற மையத்தில் நகரவில்லை அவருடைய படங்கள் .
அதைத்தாண்டிய கலை மற்றும் உளவியல் தேடல் அதில் உள்ளது. 
ஒரு ஓவியனின் தூரிகையின் அசைவுகளுக்கு ஏற்ப ஒளியில் ஓவியத்தை கையாள்கிறார் .
அங்கே விதிகளும் இல்லை விதி மீறல்களும் இல்லை.
அவரின் ஆத்ம தேடலை சரியாக அடையாளம் காண்பதும் அதை அணுகுவதும் அதற்குரிய மரியாதையை கொடுப்பதும் நமது கடமை !

Gasper Noe
Seul contre tous I_Stand_Alone
Irreversible Irreversible
Enter The Void Enter the Void - Il Film
Love (2015 film)
Carne Compartida - Short Film
Sodomites