The Clue:4th Period Mystery

UP

வாழ்க்கை என்பது ஒரு பயணம். அந்த பயணம் சாகசங்கள் நிரம்பியதாக சராசரி வாழ்வில் இருந்து மாறுபட்டதாக இருக்க வேண்டும் என்று நம்மில் பெரும்பாலானோர் ஆசைப்படுகிறோம் .

மற்றவர்களிலிருந்து நம்மை வித்தியாசப்படுத்திக்காட்ட அல்லது தனித்து அடையாப்படுத்த நம் தோற்றம் ,இயல்பு ,குணம் ,வாழ்முறை என்று அனைத்தையும் மாற்றிக்கொள்ள  முனைகிறோம் .

அப்படி எல்லாம் அடைந்த பிறகு அதில் சந்தோசமும் நிம்மதியும் இருகிறதா என்றால் பெரும்பாலானோருக்கு இல்லை என்றே சொல்லலாம் .சராசரி வாழ்க்கையில் சந்திக்கும் அன்பு கலந்த அற்புத நிமிடங்கள் சாகச வாழ்க்கையில் கிடைப்பதில்லை .நமக்கிருக்கும் இந்த ஒரே ஒரு வாழ்க்கையில் அப்படிபட்ட சந்தோசங்கள் இல்லாத நிலை   சில சமயம் வெறுமை தந்துவிடும் .

உண்மையான அன்புடன் பிறருக்கு உதவும் சில சந்தர்ப்பங்கள் ,பிரச்சனைகளை தைரியமாக எதிர்கொள்ளும் இயல்பு வாழ்க்கை 

இது  தான் உண்மை,1000 சாகசங்கள் ஈடாகாது  அன்பின் சில நிமிட தருணங்களுக்கு என்பதை உணர்த்திய அற்புத திரைப்படம் தான் UP

                       

சார்லஸ் முண்ட்ஸ் ஒரு சாகச வீரர் தென் அமெரிக்க காடுகளில் உள்ள

ஒரு அபூர்வப்பறவையின் எலும்புக் கூட்டை கொண்டுவர அப்படி ஒரு பறவையே இல்லை இது போலி என்று நிராகரிப்பதோடு அவரின் உறுப்பினர் தகுதியையும் பறித்து விடுகிறார்கள் .

அவமானத்துக்கும் கோபத்துக்கும் உள்ளான சார்லஸ் அந்த பறவையை உயிருடன் பிடித்து வருகிறேன் அதுவரை நான் திரும்பமாட்டேன் என்று சபதம் செய்து தன் நாய்களுடன் தென் அமெரிக்காவுக்கு பயணப்படுகிறார் .அதன் பிறகு அவரை பற்றி எந்த தகவலும் இல்லை .

சார்லஸை தம் ரோல் மாடலாக நினைத்து அவரைப்போலவே சாகச வாழ்க்கை வாழவேண்டும் என்று ஆசைப்படுகிறான் சிறுவன் கார்ல்  பிரெட்ரிக்சென் .அவனைப்போலவே ஒத்த ரசனை ,ஆசைகளால் சிறுமி எல்லியுடன் நட்பாகிறான் .எல்லியின் ஒரே கனவு தென் அமெரிக்க காட்டிற்கு சென்று  Paradise Falls ல் வீடு கட்டி வாழ வேண்டும் என்பது தான் .

இவர்களுடைய நட்பு காலப் போக்கில் காதலாகி இருவரும் திருமணம் செய்துகொள்கிறார்கள் .தங்களது கனவை நனவாக்க பணம் சேகரிக்கிறார்கள் .ஆனால் அந்த பணம் பல தேவைகளுக்காக மகிழ்ச்சியுடன் உடைக்கப்படுகிறது .

சாகச வீரன் ஆகவேண்டும் என்று ஆசைப்பட்ட கார்ல் ஒரு பலூன் விற்பனை செய்பவராக தன் வாழ்க்கையை வாழ்கிறார் .

குழந்தைகள் அற்ற இந்த தம்பதிகள் இறுதிவரை தங்களது கனவை நிறைவேற்ற முடியாது வாழ்கிறார்கள் .

ஒரு கட்டத்தில் எல்லி உடல்நிலை பாதிக்கப்பட்டு இறந்து விட கார்ல் தனிமையில் தவிக்கிறார் .எல்லியின் கனவை நிறைவேற்ற முடியவில்லையே என்ற கவலையும் எல்லி இல்லாத வெறுமையுமாக  அவருடைய நாட்கள் கடந்து போகிறது .

ஒருநாள் அவர் வீட்டுக்கு வருகிறான் சிறுவன் ரஸ்ஸல் .'சாரணர் சங்கத்தில் பல பதக்கங்களை பெற்று விட்டதாகவும் முதியவர்களுக்கு உதவி செய்வதன் மூலம் கிடைக்கும் ஒரு பதக்கத்தை மட்டும் இன்னும் பெறவில்லை உங்களுக்கு உதவி செய்து அதை பெறலாம் என்று நினைக்கிறன் என்ன உதவி வேண்டும் என்றாலும் கேளுங்கள்' என்று கூறுகிறான் .அவன் வரவை விரும்பாத கார்ல் வெளியேற்ற முயற்சி செய்கிறார் .ஒரு பறவை தன் தோட்டத்தை நாசம் செய்வதாகவும் அதை பிடித்து வரும் படியும் சொல்கிறார் .

இந்த சந்தர்ப்பத்தில்                                                   

கார்ல் -எல்லி பெயர் எழுதப்பட்ட தபால் பெட்டி பக்கத்து கட்டிட வேலையாளால் இடிக்கப்பட கார்லுக்கும் கட்டிட தொழிலாளர்க்கும் தகராறு ஏற்படுகிறது .கார்ல் அவரை தாக்க பிரச்னை நீதிமன்றம் வரை செல்கிறது .கார்லை முதியோர் இல்லத்துக்கு செல்லும்படி நீதிமன்றம் உத்தரவிடுகிறது .

முதியோர் இல்லம் செல்லும் நாள் வருகிறது .

முதியோர் இல்லம் செல்ல விரும்பாத கார்ல் தனது வீட்டில் ஆயிரக்கணக்கான பலூன்களை இணைத்து வீட்டையே பலூன் போல மாற்றி வீட்டோடு பறந்து செல்கிறார்  .

எல்லோரையும் ஆச்சர்யத்தில் ஆழ்த்திவிட்டு மனைவியின் கனவை நிறைவேற்றப் போகிறோம் என்ற திருப்தியுடன் தென் அமெரிக்கா நோக்கி செல்கையில் கதவு தட்டப்படுகிறது .

திறந்து பார்த்தால் வாசலில் சிறுவன் ரஸ்ஸல் .

அதிரிசியடையும் கார்ல் வேறு வழியில்லாததால் ரஸ்ஸலுடன் பயணத்தை தொடர்கிறார் .

Paradise Falls ஐ தேடி வீட்டை வைக்க முனையும் போது பேசும் நாயையும் வினோத பறவையையும் சந்திக்கிறார்கள்.

ரஸ்ஸல் அவர்களுடன் நட்பு பாராட்டுகிறான் .
அந்த பறவைக்கு 'கெவின்' என்று பெயரிடுகிறான் ரஸ்ஸல் .
முதலில் தயங்கும் கார்ல் பின்னர் அவர்களுடன் பயணத்தை தொடர்கிறார் .

ஒரு கட்டத்தில் அந்தக்காட்டில்  சார்லசை  சந்திக்கிறார் கார்ல் .

தன் ஆதர்ச நாயகனுடன் மகிழ்ச்சியாக உணவருந்துகிறார் .

ரஸ்ஸல், 'கெவின்' என்று பெயரிட்ட அந்த விநோதபறவையை  பிடிக்கத்தான் அவர் அங்கு வாழ்கிறார் ;அதற்காகத்தான் காடுகளில் நாய்களை உலவவிட்டிருக்கிறார் என்று தெரிந்துகொள்கிறார் .

தன் வீட்டிற்குள் இருக்கும்  அந்த பறவையை காப்பாற்ற வேண்டும் என்று நினைக்கும் கார்ல் அங்கிருந்து கிளம்ப நினைக்கிறார் .

கார்ல் வீட்டில்தான் அந்த பறவை இருக்கிறது என்று அறிந்து கொண்ட சார்ல்ஸ் அவர்களை துரத்துகிறார் .

சார்லசிடமும் வேட்டை நாய்களிடமிருந்தும் தப்பித்து கார்ல் எப்படி அந்த பறவையை காப்பாற்றினார் ?

அவருடைய கனவு என்ன ஆனது ?

போன்ற கேள்விகளுக்கு அற்புதமாக பதில் தருகிறது UP திரைப்படம்

அனிமேஷன் படமாக இருந்தாலும் அதை நாம் உணர முடிவதே இல்லை . நிஜமான கதாபாத்திரங்கள் போலவே உணர முடிகிறது .அத்தனை நேர்த்தியான படைப்பு .
பலூன்களை விடுவிக்க வீடு அப்படியே காற்றில் மிதந்து செல்வதும் அதை எல்லோரும் வேடிக்கை பார்ப்பதும் அனிமேஷன் என்று சொல்ல முடியாத காட்சிகள் .
வண்ண வண்ண பலூன்கள் வீட்டை பறக்கவைப்பது ரசனையான அனுபவம் .

ஆஸ்கார் விருது பரிந்துரை பட்டியலில் அனிமேஷன் பிரிவிலும் பொது பிரிவிலும் ஒரே நேரத்தில் சிறந்த படத்துக்காக பரிந்துரைக்கப்பட்டு அனிமேஷன் பிரிவில் விருது வென்றது .
Pixar ன் முதல் 3 D அனிமேஷன் படமான UP கேன்ஸ் திரைப்பட விழாவுக்கு சென்றதோடு Pixarன் அதிக வசூல் பெற்ற படங்களின் பட்டியலில் 2 ம் இடத்தில் உள்ளது

கார்லும் எல்லியும் ஆதர்ச தம்பதிகளை கண்முன் நிறுத்துகிறார்கள் .
ஒருவருக்கொருவர் அன்பை வெளிபடுத்தும் கட்டங்கள் அத்தனை அழகு .
ஒரு நடுத்தர வர்க்க குடும்பங்களின் நிலையை அழகாக பதிவு செய்கிறார்கள் .முதுமையடையும் தருணங்களையும் தனிமையின் நினைவுகளையும் அற்புதமாக தந்திருகிறார்கள் .
இருவரும் மரநிழலில் மேக உருவங்களில் தங்கள் கனவுகளை பரிமாறிக் கொள்வதும் ,வீட்டு வேலைகளை பகிர்ந்து செய்வதும் ,
இருக்கையில் ஒருவர் கையை ஒருவர் பிடித்துக்கொண்டு அன்போடு புத்தகம் படிப்பதும், முதுமையில் அன்போடு ஒருவருக்கொருவர் துணையாக இருப்பதும், தன் காதலின் அடையாளகமாக பலூன்களை கொடுப்பதும் என்று இயல்பான காதலின் அழகிய தருணங்கள் ரசிக்க வைக்கின்றன

 குழந்தைகளுக்கான திரைப்படத்தில் வழக்கத்துக்கு மாறாக 78 வயது முதியவரை கதாநாயகனாக்கி அவரின் வயதாவதன் சோகத்தையும் கனவுகளையும் மனைவி மீதான அபரிதமான அன்பையும் காண்பித்து நெகிழ வைத்திருக்கின்றார்கள் .
எல்லோரின் கோபத்தையும் சம்பாதித்துக் கொண்டு மனைவியின் கனவை நனவாக்க வேண்டும் என்று வீட்டை அந்த மலை உச்சியில் வைத்து விட்டு மனைவியின் இருக்கையை பார்த்து லேசாக புன்னகைக்கும் இடமாகட்டும் அவள் இல்லாத ஏக்கத்தை உணர்வதாகட்டும் அற்புதமான நடிப்பு .
ஒரு வீடு என்பது நம் வாழ்வின் அடையாளம் என்பார்கள் ...கார்ல்- எல்லி வாழ்க்கையின் அடையாளம் அந்த வீடு தான் .அவள் நினைவுகள் அந்த
வீட்டில் இருப்பதை முழுமையாக உணரும் கார்ல் அந்த வீட்டையும் அவள் போலவே நேசிக்கிறார்

மனைவியின் டயரியை பார்க்கையில் இறுதியில் உண்மையான வாழ்க்கை என்பது சாகசங்கள் நிரம்பியது அல்ல கார்லோடு வாழ்ந்த நாட்கள்தான் என்று எல்லி நினைத்ததை தெரிந்து கொள்கிறார்
தான் மனைவியை சந்தோசமாக தான் வைத்திருந்தோம் என்ற திருப்தியோடு கெவினை காப்பாற்ற சாகச வீரராக மாறுவதும்
தன் உயிரையே பணயம் வைப்பதும் இறுதியில் அதற்காக உயிருக்கு மேலாக நேசிக்கும் வீட்டை இழப்பதும்
இருந்தாலும் எல்லாரையும் காப்பாற்றிய சந்தோசத்தில் நாடு திரும்புவதும் என்று கார்ல் கதாபாத்திரம் மூலம் அற்புதமான விஷயங்கள் சொல்லப்பட்டிருகின்றன .

கார்லினுடைய கதாபாத்திரம்  Spencer Tracy ஐ மாதிரியாக கொண்டு படைக்கப்பட்டுள்ளது குறிப்பிடத்தக்கது .

அனிமேஷன் படத்தில் அன்பு ,வாழ்க்கை தத்துவம் என்று அற்புதமான விடயங்களை திரையாக்கிய இந்த படம் ஒவ்வொருவரும் காட்டாயம் பார்க்க வேண்டிய படம் .அன்பான மனிதர்களுடன் வாழும் வாழ்க்கையின் ஒவ்வொரு தருணங்களையும் நேசிப்போடு தொடருங்கள் என்று எனக்கு உணர்த்திய படைப்பு .
அன்பைக்கொடுப்பதும் பெறுவதும் சந்தோசம் தான் ...
வாழ்வின் அழகிய அருமையான நிமிடங்களை நாமும் சொந்தமாக்கி கொள்வோம் இவர்களைப்போல ....