Mubi

         

சினிமாவை எப்போதும் பெரிய திரையில், திரையரங்கின் சூழலுடன் காண்பதே காண்பியலின் பூரணத்தை அளிக்கும். உலகத்திரைப்படங்களை திரையிடுவதற்கென்று பிரத்தியேகமான திரையரங்குகள் இல்லாத சூழலில் அத்தகைய திரைப்படங்களை காணும் வாய்ப்புக்கள் நமக்கு மிகவும் குறைவு.

திரைப்பட விழாக்கள், திரையிடல்களில் மட்டுமே பெரிய திரையில் உலகப்படங்களை பார்க்கும் வாய்ப்புக்கள் கிடைகின்றன. திரைப்பட விழாக்களும் திரையிடல்களும் நம் மத்தியில் மிகக் குறைவாக இடம்பெறும் விடயம் என்பதால் உலகப்படங்களை பார்ப்பதற்கு DVDக்களும் இணையமும் இலகுவான வழிகளாக காணப்படுகின்றன.

இணையத்தில் torrentலும் Youtubeலும் படம் பார்க்கும் நமக்கு அனைத்துப் படங்களும் கிடைப்பதில்லை. சில நேரங்களில் அதன் தரத்திலும் குறைபாடுகள் ஏற்படுவதுண்டு. அத்தோடு தனிப்பட்ட முறையில் இலவசங்களிலும் இரவல்களிலும் எனக்கு விருப்பமில்லை. கட்டணம் செலுத்திப்பார்ப்பது, பணம் கொடுத்து DVDகளை வாங்குவது அந்த படைப்பின் உழைப்புக்கான மரியாதையை செலுத்துதல் என்று கருதுவதோடு அதில் மனத்திருப்தியை உணர்கின்றேன். 
torrent,Youtube இரண்டையும் கொஞ்சம் கொஞ்சமாக தவிர்க்க ஆரம்பித்த நேரம் Netflix அறிமுகமானது. திரையரங்கின் காண்பியல் அனுபவத்தை தராவிட்டாலும் தரமான நிலையில் சிறியதொரு கட்டணத்துடன் இணையத்தில் பார்க்கலாம். ஆனாலும் அமெரிக்க படங்கள் அதிகமாகவும் வேறு நாடுகளின் திரைப்படங்கள் மிக குறைவான நிலையிலும் இருந்தமையினால் Netflixஐ பயன்படுத்தும் ஆர்வம் ஏற்படவில்லை. அதனால் Netflix பயன்பாட்டை முடிந்தளவு தவிர்த்து வந்தேன்.

மகேஷ் ராகவனுடன் பேசுகையில் உலக திரைப்படங்களை பார்க்க ஏதும் தளங்கள் உண்டா என்று கேட்கையில் MUBI பற்றிய அறிமுகத்தை கொடுத்தார். 

MUBI - உலகத்திரைப்படங்களை பார்ப்பதற்கென பிரத்தியேகமான தளம். 

Arthouse cinema எனப்படும் சர்வதேச கலைப்படங்களை பார்க்க சிறப்பான தளமாக இணையத்தள திரையங்கு (online cinematheque ) போல தொழிற்படுகின்றது . படங்களின் சேகரிப்பு என்பதை தாண்டி தரவுகள் தகவல்கள் உட்பட இணையதள சினிமா சஞ்சிகை குறிப்பு புத்தகம் போலவும் செயற்படுகின்றது. 

MUBIயில் தினம் ஒரு திரைப்படம் பதிவிடப்படும்; அந்த படத்தை முப்பது நாட்களுக்குள் நீங்கள் பார்க்க முடியும். அதே போல தினந்தோறும் படங்கள் பதிவேற்றப்படுவதுடன் படத்தை பற்றிய குறிப்புகள், பரிந்துரைப்புகள் என்பனவும் தரப்படும். 

Cannes, Berlinale, Sundance, Venice, Locarno, Montréal, Rotterdam உட்பட கிட்டத்தட்ட 230 திரைப்பட விழாக்களுடன் இணைந்து செயற்படுகின்றது. இதனால் நாம் எளிதில் பார்க்க முடியாத திரைப்படங்களையும் குறும்படங்களையும் ஆவணப்படங்களையும் நாம் பார்க்க முடியும் (Festival-fresh Cinema) .

உலகத்தின் கவனத்திற்கு எளிதில் வராத சிறிய நாடுகளின் சிறப்பான திரைப்படங்களையும் MUBI கொண்டிருகின்றது. 

Filmmaker Retrospectives பிரிவின் மூலமாக முக்கியமான திரைப்பட இயக்குனர்களை கௌரவிக்கும் விதமாக அவர்களது படங்கள் பதிவிடப்படுகின்றது. பல நாடுகள், பல இயக்குனர்கள், பல படைப்புக்கள் என்று எண்ணற்ற படைப்புகளை பல பிரிவுகளில் நாம் MUBI யில் பார்க்க முடியும். 

MUBI பயன்படுத்த ஆரம்பித்த முதல் நாளிலேயே பயனுள்ள தளம் என்பதை உணர்ந்து கொண்டேன். 

பிரபலமான சுயாதீன திரைப்பட இயக்குனர் Jay Rosenblatt இன் முக்கியமான 25 படைப்புக்களையும் MUBIயில் காண முடிந்தது. இவரைப்போல பல சுயாதீன திரைப்பட இயக்குனர்களின் படங்களையும் பார்க்க முடியும். 

Barbara Hammer இன் ஒருசில படங்களை தவிர ஏனையவற்றை எங்கும் பார்க்க முடியாத நிலையில் 34 படைப்புக்கள் MUBIயில் பதிவு செய்யப்பட்டுள்ளன. 

போலந்து இயக்குனர் Krzysztof Zanussi, இவருடைய பெயர் கேள்விபட்டிருந்தாலும் இதுவரை அவரது படங்களை பார்க்கும் ஆர்வம் ஏற்பட்டதே இல்லை. தற்போது MUBIயில் இவரை கௌரவிக்கும் முகமாக படங்கள் திரையிடப்படவே பார்க்க ஆரம்பித்தேன். இத்தனை ஆண்டுகள் இவரது படங்களை புறக்கணித்தமைக்காக வருத்தமடைகின்றேன். அறிவியல் சார்ந்த மனிதர்களின் மனநிலையை விபரித்த Krzysztof Zanussiயின் படைப்புக்கள் எனக்கு பூஜ்ஜியத்தை நினைவு படுத்துகின்றது. ஒன்றுமேயில்லை என்று எண்ணும் பூஜ்ஜியமே பெறுமதி வாய்ந்தது என அதன் முக்கியத்துவத்தை உணர்ந்து கொள்ளும் அளவு அறிவு நிலை வளர்ச்சி எய்த கொஞ்சம் காலம் தேவை என்பதை உணர்ந்துகொண்டேன். Zanussiயின் படைப்புலகத்தை முழுமையாக புரிந்துகொள்ள நான் இன்னும் நீண்ட காலம் பயணிக்க வேண்டும் என்று புரிந்தது. இன்னும் கற்றுக்கொள்ள வேண்டும் என்ற தேடலை ஏற்படுத்தியிருகின்றது. 

திரைப்படங்களின் பார்வை வெளி,சந்தைப்படுத்தல் பற்றிய தேடல் எனக்குள் மேம்பட்டிருகின்றது. குறைந்த கட்டணத்தில் மாதம் முப்பது படங்களை HD தரத்தில் ஆங்கில உபதலைப்புக்களுடன் நல்ல ஒலியமைப்பில் பார்க்க முடியும்.

நன்றி : Mahesh Raghavan 

#Mubi #cinema #worldcinema

Comments

Popular posts from this blog

Dyketactics

ஒரு கோப்பை தேநீரில் கொஞ்சம் காதல் .....